Prosiectau'r Gyfraith

Derbyniodd Prifysgol Morgannwg nawdd i barhau i gynnig y modiwl cydweithredol 'Y Gyfraith yn Gymraeg' i fyfyrwyr yr ail flwyddyn ym Morgannwg, mewn cydweithrediad â Phrifysgolion Aberystwyth a Bangor. Mae’r modiwl hwn wedi cael ei redeg yn llwyddiannus ar ffurf cydweithredol rhwng y prifysgolion ers 2009 (gweler: Hyfforddiant Ieithyddol).

Derbyniodd Prifysgol Aberystwyth nawdd i gynnal ymryson rhyng-golegol, yn dilyn llwyddiant ymryson a gynhaliwyd yn 2011.

Derbyniodd Prifysgol Caerdydd nawdd i gyfieithu gwefan Deddfwriaeth Cymru Ar-lein (http://www.wales-legislation.org.uk/). Amcan y wefan honno yw i esbonio hyd a lled pwerau gweithredol Llywodraeth Cynulliad Cymru, ac i gyflwyno manylion ynglŷn â’r math o ddeddfau a’r mesurau y mae’r llywodraeth hwnnw yn ymwneud â hwy.

Derbyniodd Prifysgol Bangor nawdd i argraffu a chyhoeddi Geiriadur Termau’r Gyfraith, sef cyfrol a ddatblygwyd er mwyn mynd i’r afael â’r diffyg adnoddau cyfrwng Cymraeg oedd ar gael ar gyfer myfyrwyr sy’n astudio’r Gyfraith. Cyhoeddwyd mil o gopïau o’r geiriadur gan wasg Prifysgol Bangor ym mis Awst 2008, a chroesawyd ei ddyfodiad gan academyddion, myfyrwyr a chyfreithwyr trwy Gymru gyfan.

Derbyniodd Prifysgol Aberystwyth nawdd i gyfieithu erthyglau ar gyfer defnydd myfyrwyr a darlithwyr sy’n ymwneud â’r modiwl ‘Cyfraith Gofal Iechyd’, sef modiwl cydweithredol sy’n cael ei gynnal ar y cyd gan brifysgolion Aber a Bangor.

Derbyniodd Prifysgol Abertawe nawdd i greu cyfrol brintiedig ar y testun Cyfraith ac Iaith. Bydd y gyfrol – a fydd yn cael ei chyhoeddi ym mis Mai 2011 – yn ffocysu’n benodol ar y modd y gellir defnyddio cyfreithiau er mwyn datblygu, cynnal a gwarchod ieithoedd lleiafrifol ac amddiffyn buddiannau siaradwyr yr ieithoedd hynny. Bwriedir cynnwys adrannau a fydd yn trafod y pwnc hwn mewn cyd-destunau Cymreig, Prydeinig, Ewropeaidd a Byd-Eang.