Daeth cynrychiolaeth dda o athrawon mathemateg a ffiseg o ysgolion uwchradd Cymru ynghyd ym Mhrifysgol Aberystwyth ddydd Gwener 1 Gorffennaf ar gyfer seminar athrawon. Nod y seminar oedd pontio addysgu mathemateg a ffiseg rhwng y sector uwchradd ac addysg uwch, gan ganolbwyntio ar yr agwedd cyfrwng Cymraeg.

Dyma’r ail ddigwyddiad o’i fath, gan i’r Sefydliad Mathemateg a Ffiseg, Prifysgol Aberystwyth drefnu digwyddiad tebyg yn haf 2009.  Bryd hynny, canolbwyntio ar y ddarpariaeth Gymraeg yn y Sefydliad Mathemateg a Ffiseg yn unig oedd canolbwynt y digwyddiad .  Gyda’r Coleg Cymraeg Cenedlaethol bellach yn weithredol trefnwyd digwyddiad cenedlaethol oedd yn cwmpasu’r ddarpariaeth cyfrwng Cymraeg nid yn unig yn y Sefydliad Mathemateg a Ffiseg,  ond hefyd yn yr Ysgol Fathemateg ym Mhrifysgolion Abertawe a Chaerdydd. 

Clywodd yr athrawon am ddatblygiadau newydd yn y maes yn sgil sefydlu’r Coleg Cymraeg Cenedlaethol.  Mae'r rhain yn cynnwys dyfarnu darlithyddiaeth cyfrwng Cymraeg ffiseg newydd i Brifysgol Aberystwyth sy’n ychwanegol i'r darlithydd cyfrwng Cymraeg Mathemateg eisoes yn y sefydliad; dyfarnu darlithyddiaeth cyfrwng Cymraeg mathemateg i Brifysgol Caerdydd a dyfarnu Ysgoloriaeth Ymchwil Cyfrwng Cymraeg Mathemateg i Brifysgol Abertawe.  Yn ogystal, bydd Mathemateg a Ffiseg yn feysydd fydd yn gymwys ar gyfer Ysgoloriaethau Cymhelliant y Coleg gwerth £1500 i’r rheini fydd yn dechrau astudio yn y Brifysgol o Fedi 2012.  Mae’r Coleg  hefyd yn ariannu prosiectau strategol cenedlaethol  ac amlinellwyd gwaith dau brosiect oedd yn berthnasol i Fathemateg a Ffiseg sef y Prosiect Termau Addysg Uwch a Phrosiect Edward Llwyd.

Cafwyd cyflwyniadau gan staff y tri sefydliad yn amlinellu’r sefyllfa cyfrwng Cymraeg gyfredol yn y sefydliadau.  Cafwyd hefyd gyfle i wrando ar brofiadau dau fyfyriwr o’r Sefydliad Mathemateg a Ffiseg, ill dau o gefndiroedd Cymraeg hollol wahanol. 

I atgyfnerthu’r neges am bwysigrwydd sgiliau dwyieithog mewn mathemateg a ffiseg yn y gweithle, cafwyd cyflwyniadau gan Nia Roberts, Llywodraeth Cymru; Eiddig Morgan, Cyngor Sir Ceredigion ac Eilir Jones, BBC Cymru.

Croesawyd y seminar gan Mr Wyn Jones, Athro Mathemateg Ysgol Morgan Llwyd:

“Cafwyd cyflwyniadau diddorol a defnyddiol oedd yn ein hatgoffa o’n rôl fel athrawon i annog myfyrwyr i fanteisio ar y cyfleoedd mae’r Coleg Cymraeg Cenedlaethol newydd yn eu cynnig.”

Yn y prynhawn, cafwyd cyfle i rannu syniadau a meddwl am ffyrdd o gydweithio rhwng y ddau sector.  Dywedodd Dr Eleri Pryse, Prifysgol Aberystwyth:

 “Bu’r diwrnod yn gyfle euraidd i rannu gwybodaeth a syniadau.  Rydym yn gwerthfawrogi'r syniadau pendant a gawsom gan yr athrawon ar sut gallwn fel sector addysg uwch gydweithio gyda'r ysgolion a cholegau i gefnogi pobl ifanc, a'u hannog i astudio elfennau drwy gyfrwng y Gymraeg.”