Skip to main content Skip to footer

Bywyd Myfyriwr Ôl-raddedig

Bywyd myfyriwr ôl-raddedig

Sut brofiad yw bod yn fyfyriwr ôl-raddedig? 

Mae myfyrwyr ôl-raddedig yn gallu cael profiadau o astudio a chymdeithasu yn Gymraeg, hyd yn oed os ydyn nhw’n astudio mewn gwlad arall. Yn y rhan hon, fe gei di wybod am brofiadau rhai o’n llysgenhadon ôl-raddedig. Mae rhai yn byw ac yn astudio yng Nghymru, ac eraill y tu hwnt i Gymru!

Swydd Ddisgrifiad Llysgennad Ôl-raddedig Y Coleg Cymraeg Cenedlaethol

Rydym yn chwilio am fyfyrwyr ôl-raddedig brwdfrydig i rannu eu profiadau, o’r astudio a phwysigrwydd y Gymraeg i’r cymdeithasu, a cheisio denu mwy i astudio drwy gyfrwng y Gymraeg!

Rydym eisiau dy gefnogi i ddatblygu sgiliau gwerthfawr all fod o fudd i ti wrth chwilio am waith yn y dyfodol, yn ogystal â chael y cyfle i rannu dy brofiadau.

Mae’r Coleg Cymraeg wedi ymrwymo i egwyddorion cydraddoldeb ac amrywiaeth ac felly’n annog ymgeiswyr o unrhyw rhyw, oedran, anabledd, cefndiroedd Du, Asiaidd a Lleiafrifoedd Ethnig, cyfeiriadedd rhywiol a chrefydd i ymgeisio ar gyfer y rôl o fod yn llysgennad.

Cyfnod gwaith

1 Ionawr 2027 – 31 Rhagfyr 2027

Bydd bod yn llysgennad yn ehangu dy CV a datblygiad fel academydd, ac yn cynnig cyfleoedd cymdeithasol i ti. 

PWYSIG - Ni fydd modd i ni benodi myfyrwyr sydd yn eu blwyddyn olaf o astudio cwrs is-raddedig (ar hyn o bryd), gan fod y cyfnod gwaith yn hirach na'r flwyddyn academaidd. Os nad wyt ti'n siŵr os wyt ti'n gymwys, cysyllta gyda Mabon (manylion isod).

Dyma restr o’r dyletswyddau:

  • Datblygu’r ymdeimlad o gymuned ôl-radd cyfrwng Cymraeg (gyda chefnogaeth y CCC).

  • Perchnogi’r cynllun llysgenhadon ôl-radd a dweud dy ddweud dros gyfeiriad y gwaith yn sgil anghenion myfyrwyr ôl-radd.

  • Creu deunydd i’r cyfryngau cymdeithasol e.e blog/flog/ takeover ar Instagrm  am fywyd myfyriwr ôl-radd.

  • Dilyn a rhannu negeseuon cyfryngau cymdeithasol ôl-radd y Coleg - Instagram @cccolradd, a rhannu’n gyson a pherchnogi’r grwpiau Facebook a Linkedin Cymuned Ôl-radd. Cefnogi’r gwaith o farchnata a hyrwyddo’r Rhaglen Sgiliau Ymchwl.

  • Trefnu digwyddiadau ôl-radd, ar-lein neu wyneb yn wyneb, gyda chefnogaeth y CCC.

  • Cynnig awgrymiadau ar gyfer gweithdai hyfforddiant fel rhan o’r Rhaglen Sgiliau Ymchwil 

  • Cyflwyno o leiaf un erthygl academaidd i Gwerddon Fach, gyda chefnogaeth y CCC.

  • Sicrhau bod myfyrwyr ôl-radd Cymraeg yn cael gwybod am ddarpariaeth y Coleg, e.e. drwy’r Ysgol Ddoethurol a chymdeithasau ôl-radd.

  • Darparu cymorth ar y Cyrsiau Sgiliau Ymchwil

Sut i Ymgeisio?

Llenwi'r ffurflen gais isod

DYDDIAD AGOR: 18 TACHWEDD 2026

DYDDIAD CAU: 9 RHAGFYR 2026

Ffurflen Ymgeisio Llysgennad Ôl-radd 2027 Gwybodaeth Llysgenhadon Ôl-radd 2027

Llysgenhadon Ôl-radd

Ar ddiwedd pob blwyddyn, mae'r Coleg Cymraeg yn penodi Llysgenhadon Ôl-radd am gyfnod o 12 mis.

Sut fyddai rôl llysgennad ôl-radd yn fy helpu i? Wel, gallai fod o fudd i dy CV, gallai roi cyfle i ti gael dy weld, a gallai helpu dy ddatblygiad fel academydd. Rydyn ni eisiau i'r criw sy'n dod yn llysgenhadon ddatblygu 'cymuned ôl-radd' Gymraeg (gyda chefnogaeth CCC).

Ni fyddwn yn dweud wrth y llysgenhadon beth i'w wneud. Dyma gyfle i chi ddweud beth mae myfyrwyr ôl-radd ei eisiau, ac i rannu gwybodaeth am y math o gefnogaeth sydd eisoes ar gael (e.e. Rhaglen Sgiliau Ymchwil ac ati).

Ddim yn astudio yng Nghymru? Dim problem! Os byddi di'n dod yn llysgennad ôl-radd, cei di lawer o gyfleoedd i wneud pethau trwy gyfrwng y Gymraeg a allai helpu dy ymchwil, fel ysgrifennu erthygl Gymraeg ar gyfer Gwerddon Fach, gweithio ar ein stondin mewn eisteddfodau neu mewn digwyddiadau, a chyfathrebu trwy gyfrwng y Gymraeg.

Hyn i gyd a mwy... ac rydych yn cael eich talu!

Bio
Seamus Curran
Seamus Curran

Pwnc: PG Diploma Dietegydd

Prifysgol: Met Caerdydd

O ble wyt ti'n dod: Bethesda

Diddordebau: Heicio a seiclo

Hoff fand: Anweledig

Uchelgais: Bod yn ddietegydd arbennig

Pam bod yn lysgennad: Defnyddio'r iaith yn fwy aml - creu blogs a fideos.

Arwyr: Fy ffrindiau oherwydd wnaethon nhw wthio fi i siarad Cymraeg yn amlach.

Emma Grigorian
Emma Grigorian

Pwnc: Seicoleg / Addysg 

Prifysgol: Prifysgol Met Caerdydd

Dyddiad cychwyn: 1 Hydref 2024 

Teitl yr ymchwil: Rhyngweithiadau rhugl: Cymharu sgyrsiau wyneb yn wyneb ac ar-lein mewn ystafelloedd dosbarth Cymraeg i ddeall sut maent yn helpu cymhelliant dysgwyr

Mwy o fanylion: Mae cymhelliant yn hanfodol wrth ddysgu iaith newydd. Nodwedd allweddol o ryngweithiadau wyneb yn wyneb yw cymryd-tro esmwyth heb fylchau mawr neu unrhyw orgyffwrdd. Mae hwn yn creu'r argraff o ruglder mewn rhyngweithiadau rhwng siaradwyr. Gall hefyd gael effaith ar ba mor werthfawr y mae’r rhyngweithiad yn teimlo.

Mae cymryd-tro mewn rhyngweithiadau ar-lein (megis dros Zoom) yn llawer arafach ac mae'n cyfyngu cyfathrebu trwy ystumiau. O ganlyniad, gallai rhyngweithio ar-lein fod yn llai effeithiol na rhyngweithio yn wyneb yn wyneb.

Ymchwilia’r prosiect hwn a oes ‘bwlch cymhelliant’, felly, rhwng cyrsiau dysgu Cymraeg ar-lein ac yn wyneb yn wyneb. 

Erin James
Erin James

Pwnc: MA Cyfieithu Proffesiynol

Prifysgol: Aberystwyth

O ble wyt ti'n dod: Pontyclun

Mwynhau yn y brifysgol: Cymuned groesawgar a dwi'n caru'r ffaith y gallaf siarad Cymraeg bob dydd.

Arwr: Bronwen Lewis

Pam bod yn llysgennad: Uno siaradwyr Cymraeg o bob cwr o Gymru.

Uchelgais: Bod yn gyfieithydd a chyfrannu i gyrraedd miliwn o siaradwyr Cymraeg.

Diddordebau: Pêl-rwyd, mynd am dro a gigs

Beth Jones
Beth Jones

Pwnc: Hanes

Prifysgol: Prifysgol Bangor

Dyddiad cychwyn: 1 Hydref 2024 

Teitl yr ymchwil: Pêl-droed yng ngogledd Cymru c. 1958-2010: hunaniaethau, rhywedd a’r cof

Mwy o fanylion: Trwy ddefnyddio hanes llafar, diwylliant materol, yn ogystal â ffynonellau ysgrifenedig caib a rhaw, bydd y prosiect yma yn rhoi tro ffres i hanes pêl-droed yng Nghymru. Bydd hefyd yn dadansoddi pynciau amserol mewn hanes academaidd, gan gynnwys chwaraeon merched, nostalgia / y cof a hanes bob dydd. Byddaf yn ffocysu ar archwilio hunaniaethau a rhywedd mewn pêl-droed yng Ngogledd Cymru mewn perthynas gyda chlybiau lleol, y timau cenedlaethol a thimau dros y ffin.

Mae pêl-droed wedi dod yn rhan allweddol o hunaniaeth yng Nghymru yn ddiweddar, felly bydd casglu profiadau chwaraewyr, cefnogwyr a hyfforddwyr yn datblygu casgliad ar effaith pêl-droed ar Gymreictod, cymunedau a lleisiau merched o fewn amser perthnasol yn y gamp.
Ellis Evan Jones
Ellis Evan Jones

Pwnc: Biofeddygaeth

Prifysgol: Prifysgol Caerdydd

Dyddiad cychwyn: 1 Hydref 2023

Teitl yr ymchwil: Darganfod triniaethau ar gyfer clefydau niwrolegol trwy ddulliau bioffiseg a chrisialograffaeth

Mwy o fanylion: Mae clefyd Krabbe yn gyflwr niwrolegol prin sy’n effeithio 1 ym mhob 100,000 o enedigaethau, gyda disgwyliad oes byr o tua 2-4 mlwydd oed. Mae’n ganlyniad o etifeddiaeth genetig, a’i brif nodwedd yw molecylau tocsig sy’n cronni o fewn celloedd. Canolbwyntiwn ar brotein o’r enw Acid Ceramidase, sy’n cynhyrchu molecylau tocsig ychwanegol. Rydym ni’n ceisio trin y clefyd difrifol yma trwy grisialu acid ceramidase, a’i ddelweddu gan ddefnyddio cyfarpar cymhleth. Wrth ddadansoddi’r data yma medrwn ddatgelu ei  strwythur moleciwlaidd, a fydd yn ein galluogi i ddarganfod pa gyffuriau sy’n medru atal y protein rhag cynhyrchu molecylau niweidiol.

Jess Martin
Jess Martin

Pwnc: Ieithyddiaeth

Prifysgol: Prifysgol Abertawe

Dyddiad cychwyn: 1 Hydref 2025 

Teitl yr ymchwil: Cymraeg fel Ail Iaith mewn addysg bellach ac uwch: rhagdybiaethau ac agweddau dysgwyr

Mwy o fanylion:

Mae nifer y siaradwyr Cymraeg wedi gostwng eto, yn enwedig ymhlith pobl ifanc, ac mae llai o fyfyrwyr yn dewis astudio’r Gymraeg fel ail iaith ar lefel Uwch neu yn y brifysgol. Er bod Cwricwlwm i Gymru a’r Bil Addysg Gymraeg (2024) yn ceisio newid hyn, mae angen deall pam nad yw mwy o bobl yn dewis y pwnc.

Mae’r ymchwil hon yn archwilio agweddau a phrofiadau dysgwyr tuag at astudio’r Gymraeg fel ail iaith ar lefel addysg bellach ac uwch. Nod yr astudiaeth yw deall pa ffactorau sy’n dylanwadu ar eu penderfyniadau a sut y gellid cynyddu’r nifer sy’n dewis parhau i ddysgu’r Gymraeg. Bydd yr ymchwil hefyd yn ystyried cymhelliant dysgwyr a’u hyder i ddefnyddio’r Gymraeg, a sut y gallai hyn gyfrannu at gyrraedd targed Cymraeg 2050.

Beca Thomas
Beca Thomas

Pwnc: MSc Therapi Galwedigaethol (cyn-cofrestru)

Prifysgol: Caerdydd

O ble wyt ti'n dod: Bala

Hoff le yng Nghaerdydd: Parc Bute

Diddordebau: Mynd am dro

Pam astudio trwy'r Gymraeg: Haws, a gall cynnig gwasanaeth yn y Gymraeg fynd yn bell yn y maes iechyd.

Pam bod yn lysgennad: Hybu mwy i wneud eu cwrs drwy gyfrwng y Gymraeg os mae'r gallu yne.

Mwynhau yn y brifysgol: Y cyfleoedd i gyfarfod myfyrwyr.

Cara Medi Walters
Cara Medi Walters

Pwnc: Cymraeg / y Cyfryngau

Prifysgol: Prifysgol Abertawe

Dyddiad cychwyn: 1 Hydref 2025 

Teitl yr ymchwil: Bywyd a Gwaith Norah Isaac (1914–2003)

Mwy o fanylion: Roedd Norah Isaac yn arloeswr ym myd addysg Gymraeg, yn arloeswr ym myd y ddrama Gymraeg, ac yn un o gymwynaswyr mawr y Gymraeg. Er bod mân ysgrifau ar ei bywyd wedi eu cyhoeddi dros y blynyddoedd, nid oes cofiant cynhwysfawr wedi ei ysgrifennu hyd yma.

Bydd y prosiect hwn yn llanw bwlch mewn hanesyddiaeth Gymraeg, ac yn cyflawni nifer o amcanion ysgolheigaidd. Bydd yn cyflwyno astudiaeth fanwl a thrylwyr o Norah Isaac, ei bywyd, ei gwaith a’i gwaddol. Bydd hefyd yn hybu astudiaethau o fenywod blaenllaw yn hanes Cymru, gan gyfrannu at agenda Llywodraeth Cymru, y BBC a chyrff eraill i hybu ymwybyddiaeth o hanes arwyr benywaidd cuddiedig Cymru.

Cofia ein dilyn ar Instagram a LinkedIn!